1Cor 8 | ATA | STEP | Ioxe ano 'o ne vaivaikala sou la'ilali ane mi'elaxu mulai noxi'a ta lataua kalakalavoi. Nenge telavu lexe nenge mukalusi ne teno'u lavulavu. Ia lavulavu vitanisi ne uxalixu 'osa'osa kalakalavoi mo nenge ta'itinenge. Ia tanengexa'a ta menexinge nesi u'oxonenge taxali peki'ainge.

a 8:1Apo 15:29

b 8:2Xal 6:3

c 8:4Lap 4:39, 6:4; Xal 4:8

d 8:6Ep 4:5‑6

e 8:9Rom 14:13-15; Xal 5:13

f 8:11Rom 14:15, 20

g 8:13Rom 14:21

1 Corinthians 8

La'ilali Ane I'elaxu Ulai Noxi'a ta Lataua Kalakalavoi

1 ^aIoxe ano 'o ne vaivaikala sou la'ilali ane mi'elaxu mulai noxi'a ta lataua kalakalavoi. Nenge telavu lexe nenge mukalusi ne teno'u lavulavu. Ia lavulavu vitanisi ne uxalixu 'osa'osa kalakalavoi mo nenge ta'itinenge. Ia tanengexa'a ta menexinge nesi u'oxonenge taxali peki'ainge. 2 ^bItema ane uxavutala lexe anu mulavusou mii mose'i ne, anu ulavusou mii ma'ia ane laixe lexe sou anu ulavusou ne uasi. 3 Ia itema ane tanuxu Lataua no tanu ne, Lataua mulavusou. 4 ^cAno 'o vaikala sou ta'ou mii xiasinu ane mi'elaxu ulai noxi'a ta lataua kalakalavoi. Nenge telavu lexe lataua kalakalavoi ne anu mii vitanisi manina no 'a lialia 'o. Mo telavu lexe ta lataua mose'i la uasi, ia Lataua vilesisi. 5 Mo loxo umomomo sou mimii ta piena ane ileme'a lexe ta lataua loxo teitexi no opo loxotolo mo no 'a lialia 'o ne anu manina ta lataua ne tapiena mo ta tatila ne tapiena, 6 ^dia noxinge la Latauamenge anu a uxolu mo Anu vilesisi. Anu Maminge e Anusi tava'u mimii mukalusi mo maulinenge sou taxaxai noxou. Mo Tila noxinge ne Anu a uxolu ia Anu vilesisi. Anu Iesu Kalisito e tava'u mimii mukalusi xe tava'u maulinenge. 7 Ia ta mitema mukalusi ne ilavusou mii ane 'o ne uasi. Ta mitema se'i a uao ixavutalasou ilotu no 'a lataua kalakalavoisi o la sou no mine ane'i i'ou mii xiasinu la ane'i ixavutalanu lexe mii ane ne ane'i mi'elaxu mulai noxi'a ta lataua kalakalavoi, mo loxo xavutalai'a mamalaxusi la ane'i ixamulinu loxo ane'i nuni'a. 8 La sou la'ilali ne umomomo sou une'e nenge 'alai noxou Lataua uasi. Mo lexe nenge ta'ou uasi la umomomo sou nenge taxali masua no iou Lataua uasi, xe lexe nenge ta'ou la umomomo sou nenge taxali laixe no iou Lataua uasi. 9 ^eNgingi ngasaxilainge laixe xo loxo 'o io ngingi nga'oxonu aloxo ne umulinu vasimenge manamana'u ne la u'oxone'i ane'i ane mamalaxa'a ne ikuluke mo ilapau no anu uasi. 10 Xo lexe itema vile ane xavutalau mamalaxusi ne umaisinge ngingi ane ngeno'u lavulavu ane loxo ne nga'ani'ani no nano no taasou lalotu noxou lataua kalakalavoi, la masaxa uxali noxou sou u'ou mii ma'ia ane mi'elaxu mulai noxi'a ta lataua kalakalavoi ne. 11 ^fAloxo ne la sou vivinge soxu ane xavutalau mamalaxusi e Kalisito musolisou ne, ngingi ngavila'isou no anu xavutalamengi ane ne. 12 Mo lexe ngingi ngasusulixa'a ta vivinge aloxo ne mo ngamamulonu xavutalai'a se mamalaxu ne la ngingi ngesusu noxou Kalisito. 13 ^gAloxo ne la sou lexe mii ma'ia ane eni a'ou ne u'oxonu vivilo sou ulapau no 'a susu, la eni umomomo sou a'ou mii xiasinu ane ne la mamu. Mo sou eni a'oxonu sou ulapau uasi.